الأحد، 22 أغسطس 2010

وانتهت الاجازة

سنة الحياة
وطبيعة الايام ان تمر

انتهت اجازتي وحان وقت العودة الى العمل

وايضا حان وقت مفارقة الاهل والوطن والاصحاب

شعور عجيب  فما ان اقترب موعد العودة حتى اختفت فجأة كل عيوب البلد

ولم يبق من  بلدي الا وجهها الصبوح الضحوك مع دمعة تترقرق في عينيها من ألم

الفراق

ونظرة عتاب منها على رحيلي الى غيرها وافتتاني بها

فرددت نظرتها بمثلها

وكيف افتتن بغيرك فأنت الوطن ولولا ان الحياة تفعل بنا أفاعيلها ماكنت ذهبت الى

غيرك ولا فارقت حضنك

أعذريني وسامحيني.....فإن كان في العمر بقية فلنا لقاء

تحذير لكل مصري خارج مصر لا تستمع لهذه الاغنية 
http://www.youtube.com/watch?v=_NuEwGwQS3c&feature=search

الأحد، 15 أغسطس 2010

رمضان شهر كريم

ما أروع ان تكون وسط أهلك وأحبابك على مائدة الافطار في شهر العبادة شهر رمضان

وذلك بعد سنين عديدة قضيتها وحدك تخاطب الجدران ساعة الافطار

فالحمد لله ان من علي وصادفت بداية رمضان آخر الاجازة قبل العودة الى عمان الجميلة

وبدء الدوام فيها

والحمد لله سنين العزلة دي خللتني أعرف يعني ايه صيام

وهو للي عايز يعرف يتلخص في صدق النية في معاملة الله عز وجل

لأن الصيام هو العبادة الوحيدة التي تبقي بن العبد وربه حرفيا

يعني انت ماشي في الشارع وامامك وجوه كثيرة لا يعلم الا الله اذا كانوا صائمين ولا لأ؟

ولذلك يقول الله عز وجل في حديثه القدسي"كل عمل ابن آدم له الا الصوم

فإنه لى وانا أجزي به"

كل ده حلو وبنسمعه كتير طول نهار رمضان

بس لما الليل يدخل  والناس تفطر يتقلب رمضان الى شهر آخر ويتحول المسلمون الى

اناس آخرين

والاعلانات الجديدة تشتغل والفوازير العجيبة تولع الدنيا والمسلسلات تلالي ورمضان

أحلى.....واسأل مجرب......ورمضان حصري

وكلها شعارات لا تمت لجلال هذا الشهر بصلة.

شهر دعا جبريل عليه السلام في حقه وأمن الني صلى الله عليه وسلم فقال" خاب وخسر

من ادرك رمضان ولم يغفر له فقل آمين فقال

النبي صلى الله  عليه وسلم آمين"

بس للأسف زي كل حاجة في البلد كل شيء أصبح ماسخ مالوش طعم حتى المسلسلات

والفوازير ومش باقي الا صحبة الام والاخ

والاصحاب ربنا يبارك فيهم.

الاثنين، 9 أغسطس 2010

عجبي

ليه ياحبيتي مابينا دايما ســفر        دا البعد ذنـــب كبــير لا يغتفر

ليه ياحبيتي مابينا دايما بحـور       نعدي بحر...نلقى غيره اتحفـر

                                                                               (رباعيات صلاح جاهين)

في حوار شيق جدا بيني وبين احد اصدقائي وبالمناسبة هو من رجال القانون

اتكلمنا عن الحقوق المدنية لكل مواطن داخل هذا البلد العزيز فكان محور الكلام عن انه توجد مواد كتير في القانون مهملة نسيها الناس وحتى المحامين نسيوها
والمواد الجميلة دي تضمن لكل مواطن عيشة كريمة مايضيعش فيها حق

قلتله يعني ايه

قال يعني فى بعض الامور اللي بتحصل لكل مواطن في حياته

اليومية

وبتحصل كتير.....المشكلة ان المواطن ميعرفش ان له فيها حق

ويستاهل عنها تعويض

بس المشكلة ان الخصم في  هذه الامور بتكون الحكومة

قلتله ياااسالاااام

قووووول ياحبيبي قووول

قال بس خللي بالك المواطن اللي  يعمل كده يبقى حط ايده في عش

الدبابير

قلت وايه يعني ماهو احنا عايشين اصلا في عش الخوابير

هتيجي عالدبابير يعني؟؟؟؟

قاللي طب خد عندك ياسيدي

مثلا لو انت قاعد في البيت وبتتفرج على التليفزيون وسمعت أي

لفظ خارج او شتيمة مهما كانت من حقك انك ترفع قضية خدش

حياء

على الحكومة ويكون خصمك المباشر فيها هو وزير الاعلام

ونجاح القضية مضموووون

قلتله  ياسلام سلم ياسلام

هو ده القانون اللي يحمي المواطنين صح

قالى ولسه

لو فرضنا انك ماشي بعرييتك في طريق وفجأة ظهر قدامك مطب

صناعي أو كسر في الطريق كسرلك مساعد أو حصلتلك اصابه

بسببه وماكانش في لافتة تحذيرية 

المفترض انك تقف وتتصل بالشرطة عشان تعملك اثبات

حالة وبعدين تتوجه فورا الى القضاء وترفع قضية على وزارة

النقل

والمواصلات  عشان يعوضوك عن الخسائر أو الاصابات

قلتله ياسلام هو ده.....

ومكدبتش خبر وحكيت الكلام ده لصديق آخر ومن فرحه بالكلام

حلف عظيم تلاتة ان لازم يطبقه


وفعلا عند أول مطب وقع فيه

قام صديقي الاخربالوقوف في مكانه وقام بممارسة حقه القانوني

واتصل بالشرطة

وطبعا بعد ماسمع الرد

وشبع من شتايم الناس اللي في الشارع اللي هو موقف طريقهم


عمل اتصال آخرليا انا

وقالي  بمنتهى البساطة 

انا مش عايز اعرفك تاني.

الله طب وانا مالي
                                                   عجبي

الأحد، 8 أغسطس 2010

مين اللي مايحبش فاطمة

على طريقة المسلسل القديم لأحمد عبد العزيز وشيرين سيف النصر

بس فاطمة عندي انا
هي مصر
للعلم انا مقيم خارج البلد للعمل في أحد الدول الخليجية بالتحديد في سلطنة عمان الجميلة


وزي اي مصري في أول سنة غربة كان الشوق لمصر عظيم


والمقارنات بين التحضر المصري وتخلف غيرها شغال على ودنه


وشوية شوية من غير مانحس يتبدل لشعور


وعلى مدى السنين يتحول الشوق ويتبدل


بعد ماكنت بتستنى الاجازة بفارغ الصبر بقيت تستنى الاجازة تخلص بفارغ الصبر


بعد الاجازة ماكانت راحة........ ايام ما كنا شغالين في البلد ومطلعناش


أصبحت هم وتعب


ياترى ايه اللي تغير الناس اللي في البلد ولا الناس اللي طلعو من البلد


ولا تكون البلد هي اللي تغيرت


مممممم    ماظنش مصر تتغير


طب الناس اللي خرجوا؟؟؟؟؟؟


دول لو تغيروا هيتغيروا للأحسن وبعدين هقول ليه


وطبعا انا باتكلم من واقع تجربة شخصية وفي دولة واحدة بس.


طب الناس اللي فيها؟؟


برضه ماظنش لأن طبيعة شعب مش هتتغير في سنتين تلاته


طب أمال ايه اللي حصل حد يفهمني؟؟؟


ليه مش قادر اقتنع ان الطرق المكسرة والمطبات اللي تشتكي منها مساعدين أجدع عربية شيء طبيعي.


ليه مش قادر اقتنع ان محدش طايق حد وكل واحد ماشي في الشارع عامل زي البالونة مستني شكة ابرة عشان ينفجر في وش اللي قدامه شيء طبيعي.


ليه مش قادر اقتنع ان رجل الشرطة اللي واقف للشارع راجل شغال في خدمتي انا مش انا اللي كائن أقل منه في الدورة الحياتية.


وفي القطاع الخدمي يعني (التأمينات والمعاشات-السجل المدني-الجوازات) اصبح المواطن هو اللي خادم مع ان المصلحة دي انشئت لخدمته.


ياترى ايه اللي حصل؟؟؟؟


الدنيا تغيرت لا انا اللي تغيرت؟؟؟؟؟